Una nga Hitabo: WANTED MALE BOARDERS

WANTED MALE BOARDERS.

Amo ini ang nakapaskil sa tapi nga nakabitay sa gate sang nagaisahanon nga male dormitory sa Calle Anita nga kagina pa ginatalatan-aw ni Carlos.  Mga kinse minutos na sia nagatindog sa guwa kag ginabais ang kaugalingon kon masulod ukon indi agud mag-inquire.  Natalupangdan niya nga sarado ang puwertahan sang dorm kag mangkot niya kon kinanlan pa niya manuktok.  Ginpangita man niya ang doorbell apang wala gid sia ti may nakita.

Ano man ni nga dorm man? Wala na guard, wala pa doorbell. Kon wala lang ko ginpalayas sang dragon ko nga landlady kagab-i, indi man ko mapadpad di.  I have no choice.

Ginviolate ni Carlos ang Rule Number Three sang iya ginadayunan nga boarding house.  Nadakpan sia sang iya laon nga landlady nga nagagamit sang hair dryer.  Nabatian niya kuno ang hagung sini halin sa iya kuwarto kag dali-dali nga hibaluon kon diin nagahalin ang tunog.  Forced eviction ang verdict sang dragon landlady kay Carlos kon ngaa nadakpan niya ang kaugalingon nga nagatindog sa guwa sang Calle Anita Boys Dormitory.

“Maano tani?” pamangkot sang ilom kag putot nga caretaker nga nagbukas sang gate.  May bitbit ini nga balde nga may unod nga darag nga tubig halin sa pagpangdagnas sang salog.

Nakibot si Carlo pagguwa sang caretaker.

Oh, gnome.

“Manong, good morning. Inquire ko tani.”

“A, sulod lang.  Ara man da si Inis,” sabat sini dungan talikod kag bukas sang puwertahan. Nagtalsik pa sini ang tubig halin sa balde nga nagbasa sang sidsid sang pantalon ni Carlos. 

Nagpangulong-ulong si Carlos sa palibot sang dorm.  Madulom kag daw patas sang hospital ang pagplastar sang mga rooms sini. Nagaatubangay ang mga puwertahan.  Wala nagasiga ang mgafluorescent sa corridors kag bisan isa wala pa sia ti may nasugata nga male dormer, luwas lang sa babayi nga nagapamaypay halin sa daw opisina sini.  Nagpalapit si Carlos kag mahinay nga ginpihit ang puwertahan.  Pagsulod sini nagkurit ang yuhom sa daw tampulanga nga bibig sang babayi.  Madamul ang sungad sini nga mas gin-“accentuate” pa sang pula nga lipstick. Bisan ang concealersini wala nakadisponer sa pagtampuk sa lubak lubak sini nga pungyahon.

“Good morning, tita---,” mahinay nga tamyaw ni Carlos.

“Inis,” sabat sini.

“Inis.” Inis? Is that really how she pronounces her name?  Tani man lang opposite sang name ang ugali niya.  Or maybe yet another dragonlady. Pakshet gid ni.  “Ta, inquire lang ko if may available pa kamo nga rooms kag kon pila ang bedspace.  Need ko gid tani nga may mastayhan karon sa gabi-i.”

“Matranscient ka? Wala kami di gabaton transcient.”

“No.  Indi ko ‘ya magtranscient a.  Maboard gid ko as soon as possible.”

“Ah.”  Nagtindog si Inis kag may gin-ukay sa mga folders nga nagatambak sa ibabaw sang drawer.  Sagi ini ka-hum sang dumaan nga kanta, ang Put Your Head on My Shoulder ni Paul Anka.

Puta, laon gid ni mo, bulalas ni Carlos sa iya kaugalingon.

Mahinay nga ginhaplak ni Inis ang envelope sa lamesa kag may ginpagwa ini nga papel.

Nagkurinot gid ang dahi ni Carlos pagdawu ni Inis sang papel sa iya.

“Ano ni, ta?”

“Kontrata.”